બાલગીત - વર્ષા ઝરમર ઝરમર થાય

વર્ષા ઝરમર ઝરમર થાય,
મેઘો અનરાધાર કે’વાય.

વર્ષાથી ઝરણાં છલકાય,
ઝરણાંથી નદીઓ ઉભરાય,
નદી ભરી સાગર છલકાય,
દરિયેથી વાદળ ઘેરાય,
તો વર્ષા ઝરમર ઝરમર થાય.

નદી સરોવર છલકી જાય,
લીલીછમ્મ ચાદર પથરાય,
જીવોનું જીવન લહેરાય,
ધરતી મા મીઠું મલકાય.
જો વર્ષા ઝરમર ઝરમર થાય.

જળમાં કચરો બહુ ઠલવાય,
બિમારીમાં સૌ સપડાય,
જળ જો ફાવેતેમ વપરાય,
જળભંડારો ખૂટી જાય.
તો વર્ષા ઝરમર શાને થાય ?
તો વર્ષા ઝરમર શાને થાય ?
તો વર્ષા ઝરમર શાને થાય ?

- મુકેશ દવે

ગઝલ : જપતો હશે

આભ પરથી શુક્રતારો જે સમે ઢળતો હશે,
ભક્ત ઘરમાં એકતારો ત્યારે પણ બજતો હશે.

બેસતો એ જાપમાં તો યાદ એની આવતી,
ચિત્તના ચકડોળમાં એ મંત્ર શું જપતો હશે !

શ્વાસમાં ફોરમ લઈને વાયરો વ્હેતો રહ્યો,
છે નવાઈ બાગને - આ શ્વાસ ક્યાં ભરતો હશે !

દેહ ના પામી શકે ઈશ્વર અહીં યુગો સુધી,
એટલે એ દેહધારી શિલ્પીને ઘડતો હશે !

મોત આવ્યું પણ અચંબિત થઈ અને પાછું ફર્યું,
કેટલું આ જણ અહીં જીવી જીવી મરતો હશે !
- મુકેશ દવે
અમરેલી
તા. ૦૮/૧૦/૨૦૨૫, બુધવાર

ગાલગાગા ગાલગાગા ગાલગાગા ગાલગા