ગઝલ - આપણે છે

આયખાને જાળવીને ગાળવાનું આપણે છે,
શ્વાસની હદમાં રહીને હાંફવાનું આપણે છે.

ચૌ દિશાઓ ધૂંધળી છે ને પવન પણ છે ઘણો વિપરીત,
લક્ષ્ય મળશે ક્યાં હવે ? એ ધારવાનું આપણે છે.

છે ફળાઉ આ જમીં ને છે જળાશય તરબતર પણ,
જે હશે લણવાનું તેને વાવવાનું આપણે છે.

આવવાની કાલ પણ હોતી નથી કંઈ આપણી , તો-
જે મળી છે આજ એમાં રાચવાનું આપણે છે.

યંત્રથી શોધી શકાશે ક્યાં છુપાયાં છે ઝખો સૌ,
માંહ્યલો છે કેટલે એ તાગવાનું આપણે છે.

ચક્રવ્યૂહો ભેદવાની હોંશિયારી હો ભલેને,
જિંદગીના વ્યૂહમાં તો હારવાનું આપણે છે.

દેહ જ્યારે સોડ તાણીને  સદાયે પોઢવાનો,
તે પછી ચક્ષુ વગર બસ જાગવાનું આપણે છે.
- મુકેશ દવે
અમરેલી
તા.૩૦/૦૪/૨૦૨૪, મંગળવાર