ગઝલ - અનોખી નારી

બધાં સાથે અનોખો સાવ એ સંબંધ રાખે છે,

પ્રણયપ્રસ્તાવ આવે તો હૃદયને બંધ રાખે છે.

ઘણીવારે ઘણી પીડા સહીને સાવ તૂટે છે,

છતાં ચહેરા ઊપર એ સ્મિતને અકબંધ રાખે છે.

ગળામાં લાખ ડૂમાઓ ભરેલા હોય છે તો પણ,

રણકતા કંઠમાં ટહુકા તણો અનુબંધ રાખે છે.

હઠીલી જે ઘણી મંછા હૃદયના દ્વાર ખખડાવે,

પ્રવેશી ના શકે તેવો સદા પ્રતિબંધ રાખે છે.

કદી તો લાગણીના ઓધ ઊમટતા બહુ લાગે,

એ વેળાએ ઝુકાવી આંખ ને મુખબંધ રાખે છે

- મુકેશ દવે

પાન્ધ્રો

તા.૨૮/૦૯/૨૦૨૧, મંગળવાર

લગાગાગા × ૪

ગીત- પ્રીતછાંડ્યો

તરણાંને વંટોળો ફંગોળે એમ એણે ફંગોળી દીધો ગુમાનમાં,

ફટ્ રે કરમ ! હું તો ઓળઘોળ થઈ ગ્યો વેરાનમાં.

પ્રીત્યુની આશ લઈ ખેતર ખેડ્યાં ને 

એમાં વાવ્યા'તા સમણાંના બી,

કૂંણેરી પ્રીતવેલ પાંગરીને ક્હેતી કે

વ્હાલપના પાણીને પી,

હૈયામાં કોળેલાં મોતી શા મોલ ભલાં બાળીને ચાલ્યાં ગ્યાં તાનમાં.

ફટ્ રે કરમ ! હું તો ઓળઘોળ થઈ ગ્યો વેરાનમાં.

રણની રેતીમાં મેઘ ધોધમાર વરસે ને

તોય એમાં રહેતો નહીં ભેજ,

સીંચણિયાં સીંચીને કેટલાં હું સીંચું પણ 

ભીંજે નહીં સૂક્કીભઠ્ઠ  સ્હેજ,

ઝાંઝવાનાં છળથી કૈં કામણ પથરાયાં કે રહેવાયું નૈ જરાં ભાનમાં.

ફટ્ રે કરમ ! હું તો ઓળઘોળ થઈ ગ્યો વેરાનમાં.

- મુકેશ દવે

પાન્ધ્રો

તા.૨૬/૦૯/૨૦૨૧, રવિવાર

ગીત - હું તું ને નશો

તને નશો છે સુરાલયનો; મને નશો છે તારો,

એકબીજાને ઝૂમતાં રાખે આપસનો સથવારો.

મસ્ત સુરાહીધારા તારું

ભાન ભૂલાવી દેતી,

તારી નશીલી આંખો મારી

વાચાને હરી લેતી,

મદિરાછલકી સરિતાનો તું મનહર છો ઓવારો.

તને નશો છે સુરાલયનો; મને નશો છે તારો.

તને નશામાં સરગ મળે ને

મને તારામાં જન્નત,

તારામાં મદહોશ થઈને

કરું હું તારી ખિદમત,

તું આસવનો કુંભ છતાંયે લાગે અમરતક્યારો.

તને નશો છે સુરાલયનો; મને નશો છે તારો.

બેઉ નશામાં ઝૂમતાં જઈએ

શુદ્ધબુદ્ધ સાબૂત રાખી,

શાખ-નામને ડાઘ ન લાગે

એવી સૂરતા તાગી,

કેફ નિરંતર ચડતો રાખ્યો  મેં તારો; તે મારો.

તને નશો છે સુરાલયનો; મને નશો છે તારો.

- મુકેશ દવે

પાન્ધ્રો

તા. ૨૩/૦૯/૨૦૨૧, શુક્રવાર

ગીત ગોરલદે

 તું તો સખી, પાંપણના ઝૂલામાં ઝૂલતી રે મારી ગમતી ગોરલદે,

તું તો સખી, અંગઅંગ ફૂલ સમુ મ્હેકતી રે મારી ગમતી ગોરલદે.

જ્યાં જ્યાં તું જાય દલ્લ દરિયો થઈ ઘૂઘવે,

લ્હેરો પર લ્હેર બની  લાગણીઓ  ઊછળે,

તું તો સખી મોજ્યુંના મેળામાં મ્હાલતી રે મારી ગમતી ગોરલદે.

બારસાંખ ઝળુંબ્યા તોરણ ઝૂલાવતા,

ઉંબરાઓ ઉમંગે સાથિયા પુરાવતા,

તું તો સખી કુમકુમની પગલીઓ માંડતી રે મારી ગમતી ગોરલદે.

ઝંઝાની ઝીંકોને પર્વત સમ ઝીલતી,

તડકાને વીણીવીણી છાયો પાથરતી,

તું તો સખી પીડાઓ પ્હેરીનેય ઝૂમતી રે મારી ગમતી ગોરલદે.

- મુકેશ દવે.

પાન્ધ્રો

તા. ર૧/૦૯/૨૦૨૧, મંગળવાર

ગઝલ : દોડવાનું

 

ખીલતાં આ આયખાને આપણે બસ મોડવાનું,

વળગણોનું પોટલું બાંધી પછીથી છોડવાનું.

 

દ્વારને રાખી ઉઘાડાં; પાથરી નજરો હવે તો,

કોઈ આવી ઉંબરાને કંકુ-ચોખા ચોડવાનું.

 

વેગવંતી કો' નદીને પાર કરવા પૂલ બાંધો,

એમ ક્યાં આસાન હોતું બેઉ હૈયા જોડવાનું !

 

ધર્મની આડશ લઈને ચેતવો ધૂણી પછી તો,

લોકહૈયે સાવ સ્હેલું છે ધજાઓ ખોડવાનું.

 

જિંદગીના સુખ બધાંએ મેળવીને ઝંપવા દે,

શ્વાસને છોડ્યા પછી શું કૂદવાનું - દોડવાનું ?

- મુકેશ દવે

 અમરેલી

તારીખ ;૧૬/૦૮/૨૦૨૧, સોમવાર 

 

ગાલગાગા ગાલગાગા ગાલગાગા ગાલગાગા

ગઝલ : બહેની

 

એ પછી રેલ્યા કરે છે લાગણી

હાથ પર મંડાય જ્યારે આંખડી,

 

બેઉ આંખો પણ વહે છે સામટી

હાથ પર બંધાય જ્યારે રાખડી.

 

ગોળમાં મીઠાશ ત્યારે ઊમટી,

બેનડી આપે જરા શી કાંકરી.

 

ખૂશ થઈને ભાઈ આપે તો જ લે,

બેનની ક્યાં હોય છે કંઈ માંગણી.

 

હોય પોતાને ઘણીએ મૂંઝવણ,

તોય બોલે વીરને ખમ્મા ઘણી.

 

બેન છે વઢશે કદી, લડશે કદી,

વાતમાં તો પણ ઝરે છે ચાસણી

 

ચીખ તારી આથડે છે પથ્થરે,

તો હવેથી તું જ બનજે જોગણી.

-     - મુકેશ દવે
અમરેલી 

તારીખ : ૦૯/૦૮/૨૦૨૧, સોમવાર

 

ગાલગાગા ગાલગાગા ગાલગા

ગીત : રાખડીને મામૂલી ધાર મા

 

સુતરના તાંતણામાં પ્રોવેલી લાગણીનું મૂલ કદી થાય ના બજારમાં,

જીવ અલ્યા ! રાખડીને મામૂલી ધાર મા.

 

રાખડીમાં છલકાતો બ્હેનીનો નેહ

વળી રાખડીમાં બાંધવ લહેરાતો,

સુતરના ધાગાનું એવું આ બંધન

કે લીલોછમ્મ રહેતો  આ નાતો,

સાચૂકલાં મોતીની માળાની જેમ સૌ જોડાયા રે'તા સંસારમાં,

જીવ અલ્યા ! રાખડીને મામૂલી ધાર મા.

 

રાખડીનું મૂલ નંદલાલાને પૂછો કે;

શાને થયો કુરુક્ષેત્રે ઊંદર,

રાખડીનું મૂલ રાણી કર્ણાને પૂછો કે;

શાને કર્યું શીલ માટે જૌહર,

રાખડી નું સત અડીખમ આવી ઊભું રે' પીંખાતી ચીસના પોકારમાં,

જીવ અલ્યા ! રાખડીને મામૂલી ધાર મા.

-     - મુકેશ દવે
અમરેલી 

તારીખ :૦૯/૦૮૨૦૨૧, સોમવાર