હેત ચડ્યું હિલ્લોળે,
નાજુક ચ્હેરે વિસ્મિત આંખો કિલ્લોલે જ્યાં ખોળે.
હેત ચડ્યું હિલ્લોળે.
સાગર ઉપર નભ ઝૂકીને
નિત્ય કરે પયપાન,
વાદળનું પયપાન કરીને
છલકાતાં ધનધાન,
ઝરણાં-પર્વત-પંખી-ફૂલડાં કુદરતના ઘરચોળે.
હેત ચડ્યું હિલ્લોળે.
ઝરણાઓથે ઝાકળ બેસી
ડારો દે સૂરજને,
તરણાટોચે સાંજ વિરામી
પમરાવે ગોરજને,
આથમણી દશ્ય રાતઘડૂલે અંધારાને ઢોળે.
હેત ચડ્યું હિલ્લોળે.
ડાળેડાળે ફૂલો દેતાં
જોબનના વરતારા,
ચક્ષુપંખી લઈને ઉમટ્યાં
મોહ્યાના અણસારા,
વાસંતીકોકિલ ટહુકીને હૈયાઓ ઢંઢોળે.
હેત ચડ્યું હિલ્લોળે.
- મુકેશ દવે
જામનગર
તારીખ :૨૩/૦૯/૨૦૨૪, સોમવાર
ટિપ્પણીઓ નથી:
ટિપ્પણી પોસ્ટ કરો