ગઝલ : જપતો હશે

આભ પરથી શુક્રતારો જે સમે ઢળતો હશે, ભક્ત ઘરમાં એકતારો ત્યારે પણ બજતો હશે. બેસતો એ જાપમાં તો યાદ એની આવતી, ચિત્તના ચકડોળમાં એ મંત્ર શું જપતો હશે ! શ્વાસમાં ફોરમ લઈને વાયરો વ્હેતો રહ્યો, છે નવાઈ બાગને - આ શ્વાસ ક્યાં ભરતો હશે ! દેહ ના પામી શકે ઈશ્વર અહીં યુગો સુધી, એટલે એ દેહધારી શિલ્પીને ઘડતો હશે ! મોત આવ્યું પણ અચંબિત થઈ અને પાછું ફર્યું, કેટલું આ જણ અહીં જીવી જીવી મરતો હશે ! - મુકેશ દવે અમરેલી તા. ૦૮/૧૦/૨૦૨૫, બુધવાર ગાલગાગા ગાલગાગા ગાલગાગા ગાલગા