બાલગીત : ફૂગ્ગાની ભાઈબંધી

ભાઈ ! ઓલ્યા ફૂગ્ગાને મારી સાથે ભાઈબંધી,
કૂતરાની ડોકે તો પટ્ટો ને સાંકળ પણ ફૂગ્ગાની ડોકે મેં દોરી બાંધી.

ફૂગ્ગા પર દોર્યો મેં નટખટડો જોકર
અડધી મૂછો ને વળી લાંબી દાઢી,
એક આંખે કાણો ને જાડા હોઠવાળો
હોઠોની વચ્ચેથી લાલ જીભ કાઢી,
પહેરાવી ટોપી મેં લીલી ને પીળી, પહેરાવી દાદાની ખાખી બંડી.
ભાઈ ! ઓલ્યા ફૂગ્ગાને મારી સાથે ભાઈબંધી.

પાંચ-સાત ફૂંકોથી ફૂલ્યો સમાય નહીં
અમને મૂકીને એ ક્યાંયપણ જાય નહીં,
પવનમાં ઉડતો ને પાણી પર તરતો
કાંટાને તડકામાં રેઢો મુકાય નહીં,
રમી રમીને એ થાકતો ત્યારે સૂવરાવું હાળવેથી હવ્વા કાઢી.
ભાઈ ! ઓલ્યા ફૂગ્ગાને મારી સાથે ભાઈબંધી.
- મુકેશ દવે
અમરેલી
તા.૦૧/૦૯/૨૦૨૫, સોમવાર