ગીત : ભણતરનો ભાર

દોથા જેવડી દેડકડી ને માથે અધમણ ભાર, ડગમગ દેડકડી. વેંત સમાણું કૂદતી ને કુદાવે છે વાર, ડગમગ દેડકડી. એને તળાવે તરવું છે, ડૂબકી મારી રમવું છે, વમળો વચ્ચે ભળવું છે, કમળ પાને ચડવું છે, તોયે પાંખો આપી ઉડાડે ને ઊડે એ લાચાર ડગમગ દેડકડી. ગમતું એને પાણી છે, કરવી ત્યાં ઉજાણી છે, ડ્રાંઉં ડ્રાંઉં એની વાણી છે, પણ 'કુહૂં કુહૂં'માં તાણી છે, એનાં મનની રાણી તોયે થાશે તાબેદાર ડગમગ દેડકડી. કોણ આમાં એને તારે ? કોણ એના મનસૂબા મારે ? કોણ એને ચાબૂક ફટકારે ? કોણ રેસમાં રોજ ઉતારે ? નિજ સપનાંઓ માથે ઝીલે ક્યા સપનાનો ભાર ? ડગમગ દેડકડી. - મુકેશ દવે અમરેલી તા. ૧૪/૦૯/૨૦૨૫, રવિવાર