ગઝલ - પી ગયો છું

ખરેખર ખોટું ખોટું નહીં; સાચું પી ગયો છું,
ભરી ખોબો ખોબો હું આંસુ પી ગયો છું.
હું સાવ અહીં અમસ્તુ ઝૂમ્યા નથી કરતો,
નજરમાં ઘૂંટી અફીણ; ખાસ્સુ પી ગયો છું.
નઠારી યાદના પ્યાલા ભર્યા હતા કડવા,
છતાંયે મોઢું કરીને ત્રાંસુ; પી ગયો છું.
દુ:ખ પાક્યા પછીનું મીઠુંય લાગે સુખ,
હજુ તો દુ:ખેય હતું સાવ કાચું; પી ગયો છું.
અગત્સ્ય પી ગયેલા દરિયો લોહી તરસ્યો,
'મુકેશ' જીવતર હતું પ્યાસુ પી ગયો છું.
- મુકેશ દવે
 ૨૭/૦૭/૨૦૧૪