ગઝલ - દોડ્યા કરો

બન્ને ખભા પર ઊંચકીને આશ; બસ દોડ્યા કરો,

ક્યારેય ના પૂરી થવાની કાશ; બસ દોડ્યા કરો.

નિઃશ્વાસની આ ચેહ પર જોહર કરીને જીવતાં,

વેંઢારવાને જીવતી એ લાશ; બસ દોડ્યા કરો.

નાથી બળદ; સંસારગાડે જોતરી વ્હેતા કર્યા,

હાંકી રહ્યાં છે મોડિયો ને રાશ; બસ દોડ્યા કરો.

રણમાં જઈ કૂદી પડ્યાં; અંદરથી જે દાઝી ગયાં,

દાઝ્યા પછી ફૂંકીને પીવા છાશ; બસ દોડ્યા કરો.

સંસારસાગરને વલોવી રત્ન ના પામો છતાં,

ત્યાં ઝીલવાને એકઠી ખારાશ; બસ દોડ્યા કરો.

- મુકેશ દવે

અમરેલી

તા.૦૯/૧૧/૨૦૨૧, મંગળવાર

ગાગાલગા ગાગાલગા ગાગાલગા ગાગાલગા