ગીત : જંગલમાં અતિક્રમણ

બંદૂકમાંથી છૂટેલી એ ગોળીનો ધણણાટ આખાં જંગલમાં,

થરથર કંપી આકુળવ્યાકુળ પાંખોનો ફફડાટ આખાં જંગલમાં.

ડાળેડાળે કંઈ પાંદડાં ખૂદની મોજે

હર્યાભર્યાં લહેરાતાં જીવે,

આખો દિવસ સૂરજ સાથે ગોઠ ને

રાતે ચાંદાનું અજવાળું પીવે,

ત્યાં અચાનક કુહાડીની ધાકથી ફફડી ખરવાનો ખખડાટ આખાં જંગલમાં.

પળપળ અહીંયા જન્મમરણના ખેલને જોતો

નફ્ફટ થઈને વાયુ ઘૂમે,

રોજ અહીં તો જીવન માથે દસેદશ્યેથી

કાળમુખાળું મોત ઝળુંબે,

તે છતાંયે શોખજણ્યાં એ લોહી તરસતાં બાણોનો ગભરાટ આખાં જંગલમાં.

- મુકેશ દવે

પાન્ધ્રો

તા.૨૧/૧૨/૨૨, બુધવાર

ગઝલ - સાધુ

એની   વાણીમાં  જાદુ  છે,

પણ એ અલગારી સાધુ છે.

ભિક્ષાપાત્ર અખૂટ રહે પણ,

ખપ  પૂરતું  એણે  ખાધું  છે.

અંગે   ભસ્મ  ઘરેણું   એનું,

ખુદ  ઈશ્વર  એનું  નાણું છે.

મિલકતમાં તો જીરણ કંથા,

શંખ, ચલમ ને બસ વાજુ છે.

આંખે છલક્યો જાય અમીરસ,

ને   અંગારા   પર   કાબુ    છે.

આંખો  મીંચી   બ્રહ્માંડ  જુએ

તો,  સઘળું   આજુ-બાજુ   છે.

શ્વાસોમાં   આરાધ  અલખનો,

ભવભવનું   સાચું   ભાથું   છે. 

- મુકેશ દવે

પાન્ધ્રો

તા.૧૫/૧૨/૨૦૨૨, ગુરુવાર

૮ગા

ગઝલ : પડઘા

સુખ છલોછલ ઘરમાં વરસી રહ્યા જ્યાં તડકા,

એટલે અંદરથી દાઝી ગયાં સૌ અડધાં.

મંચ પર જ્યાં મારો કિરદાર આવ્યો ત્યાં તો,

કોઈ આવી સહસા પાડી ગયેલું પડદા.

એવી ચમકી ઊઠી'તી આંખ એને જોતાં,

પ્રાણ ફૂંકતા થાતાં જાણે સજીવન મડદાં.

હો ગરીબી તો પણ વસતો સુદામો હૈયૈ,

શામળો દોડીને આવે લઈને પગ અડવા.

નાભિથી ઊઠે ઘેરો નાદ તો;  હે ઈશ્વર !

તારા ધામે એના ઊઠી જવાના પડઘા.

- મુકેશ દવે

પાન્ધ્રો

તા.૧૩/૧૨/૨૦૨૨, સોમવાર

ગાલગાગા ગાગા ગાગાલગાગા ગાગા

ગીત - દલ્લ લળીલળી જાય

નમણાં શા ચહેરાની મૃગલાં શી આંખો પર પાંપણ ઢળે તો અલ્યા શું શું રે થાય ? શું શું રે થાય ?

બીજું શું થાય ? અલી, ભોળુંભટ્ટ દલ્લ પીટ્યું ઢળીઢળી જાય; લળીલળી જાય.

ઝેરીલી નાગણ શી ગાલોને ચૂમે

એ વાંકી લટોનો ડંખ વાગે,

કાળઝાળ ઝેર એનું રગરગમાં વ્યાપે તો

અધરોનાં ઓસડિયાં માંગે,

તીખી નજરથી તાક્યાં તીરછાં એ તીરોમાં કામણ ભળે તો અલ્યા શું શું રે થાય ? શું શું રે થાય ?

બીજું શું થાય ? અલી, ભોળુંભટ્ટ દલ્લ પીટ્યું ઢળીઢળી જાય; લળીલળી જાય.

સાતસાત સૂર ભલા કંઠમાં હો બેઠા ને

અધરો પર સરગમ બિરાજે,

પગરવના તાલે વળી હિલ્લોળતા અંગોનું

નર્તન છુપાવ્યું લોકલાજે,

ઝાંઝરીના છમછમથી રણઝણતી રાતોનાં સપનાં ફળે તો અલ્યા શું શું રે થાય ? શું શું રે થાય ?

બીજું શું થાય ? અલી, ભોળુંભટ્ટ દલ્લ પીટ્યું ઢળીઢળી જાય; લળીલળી જાય.

- મુકેશ દવે

અમરેલી

તારીખ :૧૭/૧૧/૨૦૨૨,ગુરુવાર

ગીત : ક્યાં લગી ?

 સૂનાં હૈયામાં ઉમટ્યાં તોફાન, તોફાન અમે ક્યાં લગી ઝેલશું ?
કોરી આંખોથી વ્હેતાં થ્યાં ગાન, ગાન અમે ક્યાં લગી ઝીલશું ?

દસેદસ દશ્યથી અંધારા ઊમટે,
અંધારે આથડતો દરિયો કંઈ ઊછળે,
ભાંગી નાવડી ને તૂટ્યાં સુકાન, સુકાન અમે ક્યાં લગી ઝાલશું ?
સૂનાં હૈયામાં ઉમટ્યાં તોફાન, તોફાન અમે ક્યાં લગી ઝેલશું ?

સુસવાટે સુસવાટે વાયરો વિંઝાય છે,
નાનેરી ઝૂંપડીમાં દીવડો મૂંઝાય છે,
ભાંગ્યા હિંડોળે થાતાં બેભાન, બેભાન અમે ક્યાં લગી ઝૂલશું ?
સૂનાં હૈયામાં ઉમટ્યાં તોફાન, તોફાન અમે ક્યાં લગી ઝેલશું ?
- મુકેશ દવે
અમરેલી
તા.૨૮/૦૮/૨૦૨૨ રવિવાર

ગીત - છોરો આંબાનો મૉર

છોરાનાં ખિસ્સાંમાં ચણિયા બોર; ચણિયા બોર,

છોરો કડકડતી ટાઢ્યમાં આંબાનો મૉર; આંબાનો મૉર.

છોરો ગજવે માલામાલ,

છોરી રેશમી   રૂમાલ,

છોરી પાણીપાણી થાય,

છોરો માથાબોળ ન્હાય, 

પછી બોરાં વાવ્યા 'ને છોરો થયો ગુલમ્હોર; થયો ગુલમ્હોર.

છોરો કડકડતી ટાઢ્યમાં આંબાનો મૉર; આંબાનો મૉર. 

છોરી સરવરની પાળ,

છોરો ઝળુંબેલી ડાળ,

છોરી મઘમઘતું ફૂલ, 

છોરો મ્હેંકમાં મશગૂલ, 

પછી છોરાના હૈડામાં થીજી ગયો પ્હોર; થીજી ગયો પ્હોર. 

છોરો કડકડતી ટાઢ્યમાં આંબાનો મૉર; આંબાનો મૉર.

છોરી કોયલનો કંઠ,

છોરો પીવે આકંઠ, 

છોરો ચપટી બોર આપે,

છોરી સૂંડોભરી ચાખે,

પછી છોરીની ચુંદડીમાં ગુંજ્યો કલશોર; ગુંજ્યો કલશોર.

છોરો કડકડતી ટાઢ્યમાં આંબાનો મૉર; આંબાનો મૉર.

- મુકેશ દવે

અમરેલી

તારીખ :૨૦/૦૭/૨૦૨૨, બુધવાર