મોજે હિલ્લોળા - ગીત

ચાલોને મનમોજી જીવડાં મોજે હિલ્લોળા ભણીએ રે,
બથમાં લઈ આખાં આ નભને પંખીટૌકા ચણીએ રે.

હોઠેથી છટકેલું ગાણું આંગળીઓમાં
                           અક્ષર થઈને ફૂટે,
હળવેહળવે હથેળીઓમાં કેસરવરણો
                           રંગ કસુંબલ ઘૂંટે,
શ્વાસેશ્વાસે લહેરી જાતાં શબ્દ કણસલાં લણીએ રે.
ચાલોને મનમોજી જીવડાં મોજે હિલ્લોળા લઈએ રે,

આંખોમાં સપનાં તો ઊગે- તૂટે -
                           ફૂટે- બટકે ને લટકે,
સાલ્લી એની જાત જ એવી તું
                           શાને એની પાછળ ભટકે ?
ભીતરમાં ઝંખનાના મૃગલાં એને શાથી હણીએ રે !
બથમાં લઈ આખાં આ નભને પંખીટૌકા ચણીએ રે.
- મુકેશ દવે
અમરેલી
તા.૦૬/૧૦/૨૦૧૮ શનિવાર