બેઠાં - ગઝલ

એવું તો કૈં ભાળી બેઠાં.
અંતરને અજવાળી બેઠાં !

ચ્હેરા ઊપર ચ્હેરો મૂકી,
આસુંઓને ખાળી બેઠાં.

વૃક્ષો સઘળાં માનો ખોળો,
કલરવને સંભાળી બેઠાં.

સગપણનાં આ જંગલ વચ્ચે,
જાત અમારી બાળી બેઠાં.

એથી તો આ સાંજ ઢળી છે,
પાંપણને એ ઢાળી બેઠાં.

શાતા ક્યાંથી મળશે અમને !
અંગારા પંપાળી બેઠાં.

અક્ષરના અજવાળે જોયું,
મૂકેશમાં વનમાળી બેઠાં.
- મુકેશ દવે
તા.૦૫/૦૭/૨૦૧૭
વિશેષ નોંધ - કવિશ્રી લાલજી કાનપરિયાસાહેબની ગઝલ - ";સપનાઓને પાળી બેઠાં" ના રદીફ-કાફિયા પરથી .......