ગીત : રાખડીને મામૂલી ધાર મા

 

સુતરના તાંતણામાં પ્રોવેલી લાગણીનું મૂલ કદી થાય ના બજારમાં,

જીવ અલ્યા ! રાખડીને મામૂલી ધાર મા.

 

રાખડીમાં છલકાતો બ્હેનીનો નેહ

વળી રાખડીમાં બાંધવ લહેરાતો,

સુતરના ધાગાનું એવું આ બંધન

કે લીલોછમ્મ રહેતો  આ નાતો,

સાચૂકલાં મોતીની માળાની જેમ સૌ જોડાયા રે'તા સંસારમાં,

જીવ અલ્યા ! રાખડીને મામૂલી ધાર મા.

 

રાખડીનું મૂલ નંદલાલાને પૂછો કે;

શાને થયો કુરુક્ષેત્રે ઊંદર,

રાખડીનું મૂલ રાણી કર્ણાને પૂછો કે;

શાને કર્યું શીલ માટે જૌહર,

રાખડી નું સત અડીખમ આવી ઊભું રે' પીંખાતી ચીસના પોકારમાં,

જીવ અલ્યા ! રાખડીને મામૂલી ધાર મા.

-     - મુકેશ દવે
અમરેલી 

તારીખ :૦૯/૦૮૨૦૨૧, સોમવાર