ગીત :- સપના વાવો.

ગીત :-
સાવ ઉજ્જડ મનોભૂમિમાં
દિગ્મૂઢ થઈને ભટકે છે લોક સપના વાવો.
ઘૂઘવતી ખારાશ તરીને
અધવચ્ચે જઈ અટકે છે લોક સપના વાવો.

ઊંઘ હોય તો શમણું આવે
મૂર્છામાં શેં આવે ?
આંખ વિખૂટી નજરું લઈને
અંધારે અથડાવે,
મૂંઢમારથી મૂર્છિત થઈને પટકે છે લોક સપના વાવો......સાવ ઉજ્જડ...

આંગળ છૂટ્યાં નખના તૂટ્યાં
લોહીભીના સગપણ,
અગમનિગમના ઓળા ફેંકી
તૂટી ગયાં કણકણ,
પડછાયાની પાછળ અંધીદોટ મૂકે લોક સપના વાવો.....સાવ ઉજ્જડ..
- મુકેશ દવે
૧૫/૭/૧૪