દલડાંના ધબકારા થંભાવી દેતા આ આંગળીના લવકારા વસમાં બહુ લાગે,
ઝાટકે દીધાની જાણે સામટી પીડાઓ લ્યા ! ગભરૂડાં નખલામાં જાગે.
કીયા તે ભવના વેર લઈ બાવળિયો
ફળિયામાં આવીને ઊગ્યો,
મૂઓ અભાગિયો હલકટ સાવ એવો
કે ટેરવાની લગોલગ પૂગ્યો ,
ઊંહકારા ભરતી કાળી ઓશિયાળી રાતોની નિંદરાયું દૂરદૂર ભાગે,
ઝાટકે દીધાની જાણે સામટી પીડાઓ લ્યા ! ગભરૂડાં નખલામાં જાગે.
અમથી શી આંગળીએ કાયાને બાન લઈ
લીધો હાય ! કારમો ઉપાડો,
પીડાના થેલા પર થેલા ભરીને કોઈ
મધદરિયે જઈને ડૂબાડો,
આંગળી પાક્યાની કેવી આકરી વેળાયું સીધી કાળજામાં સોંસરવી વાગે,
દલડાંના ધબકારા થંભાવી દેતા આ આંગળીના લવકારા વસમાં બહુ લાગે.
- મુકેશ દવે
અમરેલી
તા. ૦૩/૦૫/૨૦૨૧, સોમવાર
ટિપ્પણીઓ નથી:
ટિપ્પણી પોસ્ટ કરો