ગીત - છલકાતો નેહ

 

મારી આંખોથી છલકાતો રસરસતો નેહ તારા વક્ષના ઉભારામાં હલકે,

હોઠો પર મૂકું જ્યાં હળવા શા ફૂલ ત્યારે ખીણ મહીં ઝરણાંઓ છલકે. 

 

કાળાડિબાંગ મેઘ ઝૂલ્ફોથી ઉતરીને

લીસ્સીલસ પીઠને પસવારે,

આંગળીઓ હળુંહળું ભીંજાતી જાય

એના છલકાતા નેહને નીતારે,

રેશમની સેજ જેવી સુંવાળી કાયા પર ટેરવાંઓ મીઠુંમીઠું ટહુકે,

મારી આંખોથી છલકાતો રસરસતો નેહ તારા વક્ષના ઉભારામાં હલકે.

 

હાથની રેખાઓ એકમેકમાં ઓગળતી

ને હોવાપણાંનું ભાન ભૂલે,

શ્વાસોમાં શ્વાસ એમ ગૂંથાતા જાય પછી

દ્વાર એકાકારના ખૂલે,

ધસમસતું લોહી બધું ગાલો પર બેસીને શરમાતું શરમાતું મલકે,

મારી આંખોથી છલકાતો રસરસતો નેહ તારા વક્ષના ઉભારામાં હલકે,

- મુકેશ દવે

 અમરેલી

તારીખ ૧૯/૦૫/૨૦૨૧, બુધવાર