ગીત ગોરલદે

 તું તો સખી, પાંપણના ઝૂલામાં ઝૂલતી રે મારી ગમતી ગોરલદે,

તું તો સખી, અંગઅંગ ફૂલ સમુ મ્હેકતી રે મારી ગમતી ગોરલદે.

જ્યાં જ્યાં તું જાય દલ્લ દરિયો થઈ ઘૂઘવે,

લ્હેરો પર લ્હેર બની  લાગણીઓ  ઊછળે,

તું તો સખી મોજ્યુંના મેળામાં મ્હાલતી રે મારી ગમતી ગોરલદે.

બારસાંખ ઝળુંબ્યા તોરણ ઝૂલાવતા,

ઉંબરાઓ ઉમંગે સાથિયા પુરાવતા,

તું તો સખી કુમકુમની પગલીઓ માંડતી રે મારી ગમતી ગોરલદે.

ઝંઝાની ઝીંકોને પર્વત સમ ઝીલતી,

તડકાને વીણીવીણી છાયો પાથરતી,

તું તો સખી પીડાઓ પ્હેરીનેય ઝૂમતી રે મારી ગમતી ગોરલદે.

- મુકેશ દવે.

પાન્ધ્રો

તા. ર૧/૦૯/૨૦૨૧, મંગળવાર