હઝલ --- આવે

*એક હાસ્ય રચના*

સ્વાદમઢ્યા કોળિયામાં વાળ આવે,

એથી તો ભલો વહેલો કાળ  આવે.

લાચારીની આ પરાકાષ્ઠા તો જુઓ !

હાથ ન પહોંચે ત્યાં ખંજવાળ આવે.

આ ભાગ્ય પણ અવળચંડુ હોય છે,

દોડવું જ નથી ને સામે ઢાળ આવે.

રોંઢા સુધી ભણ્યા હો તોય શું થયું ?

જીવનના હર પગલે નિશાળ આવે.

સંસારગાડું કોઈનું સુતરું ન ચાલે,

એમાંય ઉલ્લાળ અને ધરાળ આવે.

બેઉ છેડા જિંદગીમાં સરખા મળે,

વૃદ્ધ શરીરમાં સ્વભાવે બાળ આવે.

માત્ર ઘડિના બંધમાં કાંડું હતું ખૂશ,

મીંઢોળ સાથે ઘણી જંજાળ આવે..

-મુકેશ દવે
તા.૨૮/૫/૧૪