ગીત : તારા ગામનો વરસાદ

તારે ગામ વરસાદ પડ્યો ને વાછટ અહીંયા લાગી, 

લ્હેરાવી તેં ભીની ઝૂલ્ફો હૈયે સરગમ જાગી, 

તારા નભમાં ગાજે વાદળ; 

અહીંયા વીજ ઝબૂકે, 

તારે પાદર ગ્હેકે મોરાં; 

લળતી ઢેલડ ઝૂકે, 

તું લહેરાતું લીલું ખેતર ધનધન હે બડભાગી, 

તારે ગામ વરસાદ પડ્યો ને વાછટ અહીંયા લાગી.

તારી ભીની કાયા પરથી

વાયરો વાતો આવે, 

મ્હેક માટીની લજ્જા પામે 

સોડમ એવી લાવે, 

'તારે આંગણ હું પણ વરસુ' મંછા મીઠી જાગી, 

તારે ગામ વરસાદ પડ્યો ને વાછટ અહીંયા લાગી.

તારાં ઘરનાં નેવાં છલક્યા; 

પાળ ફળીની તૂટી, 

મેં રોપેલા બીજ અંદરથી 

મઘમઘ વેલી ફૂટી, 

નદી બની તું આવ દોડતી તારો પર્વત ત્યાગી, 

તારે ગામ વરસાદ પડ્યો ને વાછટ અહીંયા લાગી.

- મુકેશ દવે

અમરેલી

તા.૨૧/૦૭/૨૦૨૧, બુધવાર