ગીત -મારું કલ્પન

આવ, કરું વર્ણન તારું જે મારું કલ્પન દોરે છે, 

અંતરમાં અત્તરને ભરતા રમ્યભાવો ત્યાં મ્હોરે છે.. 

હોઠે નમણું સ્મિત રેલાતું; 

આંખોથી મદિરા છલકે, 

દંતશ્રેણીમાં દાડમકળીઓ; 

ગાલો પર લાલી મલકે, 

મેઘઘટા શી કાળી ઝૂલ્ફો ચંદ્રમુખ પર લહેરે છે.

આવ, કરું વર્ણન તારું જે મારું કલ્પન દોરે છે,

 

અંગભંગીની છટા નિરાળી;

જોતાં જાગી ઊઠે સ્પંદન. ,

પગની પાની ભોંયે ના છબતી 

વમળ કરે જાણે કે નર્તન,

કમર લચકતી તારી હલકને લોકની નજરો ચોરે છે. 

આવ, કરું વર્ણન તારું જે મારું કલ્પન દોરે છે, 

સાદગી-લજ્જાના આભૂષણ; 

એમાં ભળતું ગાલનું ખંજન, 

હૈયામાં તરુવરની સ્થિતિ; 

કંઠમાં છે પાંખીનું ગુંજન, 

આભ નીતરતું હો એમ વરસી ભીની પ્રીત બટોરે છે. 

આવ, કરું વર્ણન તારું જે મારું કલ્પન દોરે છે, 

- મુકેશ દવે

અમરેલી

તા. ૦૧/૦૭/૨૦૨૧, ગુરુવાર