ગઝલ - ચૂપ હું રહેતો નથી

હો ધાકનો વિસ્તાર જ્યાં; ત્યાં ચૂપ હું રહેતો નથી,
ને મૌન પરના વાર જ્યાં; ત્યાં ચૂપ હું રહેતો નથી.

હા, આંગળી જો દોષને ચીંધે; તો એ મંજૂર છે,
ખૂંચે કદી તલભાર જ્યાં; ત્યાં ચૂપ હું રહેતો નથી.

ફાલી જશું, પડશું લચી, સૌના ઉદર ઠારી જશું,
ઝંઝેડતાં દેમાર જ્યાં; ત્યાં ચૂપ હું રહેતો નથી.

બહુ સૌમ્ય છું ને ઘૂંટ કડવા પી શકું છું, તે છતાં-
બેધારી તલવાર જ્યાં; ત્યાં ચૂપ હું રહેતો નથી.

ભડકે બળે આ આયખું તો પણ કશી પરવા નથી,
સળગાવતાં ઘરબાર જ્યાં; ત્યાં ચૂપ હું રહેતો નથી.

ઉત્સુક હોઉં સત્કારવા સૌ દોસ્તને ખૂલ્લાં દિલે,
મન હો કપટની ધાર જ્યાં; ત્યાં ચૂપ હું રહેતો નથી.

નિર્દોષતાની સાબિતી લઈને ભલે આવો તમે,
પણ જૂઠનો આધાર જ્યાં; ત્યાં ચૂપ હું રહેતો નથી.
- મુકેશ દવે

અમરેલી

તા. ૨૫/૦૪/૨૦૨૩, મંગળવાર

ગાગાલગા ×૪