નમણાં શા ચહેરાની મૃગલાં શી આંખો પર પાંપણ ઢળે તો અલ્યા શું શું રે થાય ? શું શું રે થાય ?
બીજું શું થાય ? અલી, ભોળુંભટ્ટ દલ્લ પીટ્યું ઢળીઢળી જાય; લળીલળી જાય.
ઝેરીલી નાગણ શી ગાલોને ચૂમે
એ વાંકી લટોનો ડંખ વાગે,
કાળઝાળ ઝેર એનું રગરગમાં વ્યાપે તો
અધરોનાં ઓસડિયાં માંગે,
તીખી નજરથી તાક્યાં તીરછાં એ તીરોમાં કામણ ભળે તો અલ્યા શું શું રે થાય ? શું શું રે થાય ?
બીજું શું થાય ? અલી, ભોળુંભટ્ટ દલ્લ પીટ્યું ઢળીઢળી જાય; લળીલળી જાય.
સાતસાત સૂર ભલા કંઠમાં હો બેઠા ને
અધરો પર સરગમ બિરાજે,
પગરવના તાલે વળી હિલ્લોળતા અંગોનું
નર્તન છુપાવ્યું લોકલાજે,
ઝાંઝરીના છમછમથી રણઝણતી રાતોનાં સપનાં ફળે તો અલ્યા શું શું રે થાય ? શું શું રે થાય ?
બીજું શું થાય ? અલી, ભોળુંભટ્ટ દલ્લ પીટ્યું ઢળીઢળી જાય; લળીલળી જાય.
- મુકેશ દવે
અમરેલી
તારીખ :૧૭/૧૧/૨૦૨૨,ગુરુવાર
ટિપ્પણીઓ નથી:
ટિપ્પણી પોસ્ટ કરો