ગીત : ટેરવાની કમાલ

ટેરવાંને આંખો જો ફૂટે; ને હેય્ય પછી કાગળની છાતી પર રોપે પલાશ.

વાયરોય સાંતીએ જૂતે; ને હેય્ય પછી ઝાકળ પર પાડી દે ઊંડેરા ચાસ.

કાગળ તો જાણે કે રૂપેરી ફળિયું
ને ફળિયામાં ઉતરે શબ્દોના પંખી,
સુરીલું ગાશે કોઈ અવસરિયું ગાણું
ને ગાશે મરશિયાઓ શાતાને ઝંખી,
ટેરવાને પાંખો જો ફૂટે; ને હેય્ય પછી પાંખોમાં ફફડાવે આખું આકાશ.
ટેરવાંને આંખો જો ફૂટે; ને હેય્ય પછી કાગળની છાતી પર રોપે પલાશ.

ફળિયાંના ખૂણામાં ફૂલોની ક્યારી
ને ક્યારીએ છલકતાં રંગોના ઝરણાં,
ભમરા-પતંગાઓ આમતેમ ઊડે
ને પાંખડીઓ આવીને ત્રોફાવે છૂંદણાં,
ટેરવાને ફોરમ જો ફૂટે; ને હેય્ય પછી ખોબાભર છાંટશે સૌને સુવાસ.
ટેરવાંને આંખો જો ફૂટે; ને હેય્ય પછી કાગળની છાતી પર રોપે પલાશ.
- મુકેશ દવે

પાન્ધ્રો

તા. ૨૭/૦૨/૨૦૨૩, સોમવાર