પ્રસ્તાવ જ્યારે હો વિફળ તો ચૂપ ત્યાં થઈ જાઉં છું,
એના નયન દેખું સજળ તો ચૂપ ત્યાં થઈ જાઉં છું.
ચાહું; છતાં ના કહી શકું એ વાત એને બેધડક,
જો મૌન; સામે હો અકળ તો ચૂપ ત્યાં થઈ જાઉં છું.
એને ઉમળકાથી હવે તો હાલ ના પૂછી શકું,
એ થાય જો આકળવિકળ તો ચૂપ ત્યાં થઈ જાઉં છું
સંધાન ના સાધી શકું; દાવાદલીલો શું કરુ?
જે વાતનું ના હોય તળ તો ચૂપ ત્યાં થઈ જાઉં છું.
મન જાણવાના સૌ પ્રયાસો વ્યર્થ રહી જાશે હવે,
ચ્હેરા ઉપર જોઉં પડળ તો ચૂપ ત્યાં થઈ જાઉં છું.
- મુકેશ દવે
પાન્ધ્રો
તા. ૨૮/૦૨/૨૦૨૩, મંગળવાર
ટિપ્પણીઓ નથી:
ટિપ્પણી પોસ્ટ કરો