રંગભીની છોળ્યું - ગીત

એને ઊગ્યું છે ગાલે ગુલાબ કે રંગભીની છોળ્યું ઊડી,

એને અંબોડે ઘટાટોપ આભ કે રંગભીની છોળ્યું ઊડી.

આખાય આભ સાથે ઊગતી સવાર

એના અધરો પર આવીને બેઠી,

મંજરીની મ્હેકભરી ટહુકાભર કોયલડી

રણઝણતા કંઠમાં પેઠી,

એની ચાલમાં છે ફાગણિયો ફાગ, કે રંગભીની છોળ્યું ઊડી,

એને ઊગ્યું છે ગાલે ગુલાબ કે રંગભીની છોળ્યું ઊડી,

છૂંદણાંમાં બેઠેલા મોરલાઓ ટહુક્યા

ને આંખોમાં મૃગલાઓ ઠેકે,

ચૂંદડીમાં ઝળકે છે લાખલાખ સૂરજ

ને કમખાના ફૂલડાંઓ મ્હેકે,

એને સંભળાતો સાજણનો સાદ,કે રંગભીની છોળ્યું ઊડી,

એને ઊગ્યું છે ગાલે ગુલાબ કે રંગભીની છોળ્યું ઊડી.

- મુકેશ દવે

ખડસલી

તા.૨૪/૦૮/૧૯૮૪, શુક્રવાર
Modify 

અમરેલી

તા. ૦૭/૦૮/૨૦૨૦, શુક્રવાર