ગીત - દરિયો કહું કે બીજું શું ?

માછલીની આંખમાથી ઉદ્ભવતા દૃશ્યોને દરિયો કહું કે બીજું શું ?

દિનરાત ઘૂઘવતો દરિયો હોય એમ અહીં

સોળવલ્લાં સપનાઓ ઘૂઘવે,

સામટી ખારાશ બધી પેટાળે ધરબીને

મીઠાં ઝરમરિયામાં ભીંજવે,

મુગ્ધાની આંખમાંથી ઉછળતાં યૌવનને દરિયો કહું કે બીજું શું ?

માછલીની આંખમાથી ઉદ્ભવતા દૃશ્યોને દરિયો કહું કે બીજું શું ?

 

દરિયાની જેમ ઓલ્યા મનખાના મનડાને

હોય નહીં ખડકી કે ઝાંપા,

કાંઠાની ઝંખનામાં મોજાંઓ ઊછળે એમ

મનખાને હોય છે ઝૂરાપા,

વિજોગણ આંખમાંથી છલક્યા ઉજાગરાને દરિયો કહું કે બીજું શું ?

માછલીની આંખમાથી ઉદ્ભવતા દૃશ્યોને દરિયો કહું કે બીજું શું ? 

 - મુકેશ દવે

અ અમરેલી

ત તા.૧૨/૦૪/૨૦૨૧, સોમવાર