ગીત : જીવલાની જંજાળ

 

સાવ રે કાચા ઘરની ભીંતે મૂક્યા છે કંઈ ખોલાંપોલા દસદસ રે કમાડ,

નથી રે સાંકળ એને, નથી રે ભોગળ એને , નથી રે કોઈ આડીઊભી આડ.

ઈરે ઘરમાં જીવલો માલમ એકલો રહેતો

પ્હેરે વિધવિધ માયા,

ખટરસોમાં વરવી એકલતાને ઘૂંટી
રોદણાં કરે ગાયા,

નિજના ફળિયે ફરતાં રોપ્યા ખૂદની જેવા મૂળ વિનાના સાવ રે ઠૂંઠા ઝાડ,

સાવ રે કાચા ઘરની ભીંતે મૂક્યા છે કંઈ ખોલાંપોલા દસદસ રે કમાડ.

દસ દશ્યેથી વાયરો વાઈ ઘરમાં ઘૂસી

ઉડાડે પડાળ,

ખૂલ્લી ભીંતોની વચમાં પેલો જીવલો ઝૂરે

કોઈ બાંધો ચોફાળ.

એક પછી એક પડળ તોડી જીવલે ખોલી પોતે બાંધેલી ફરતી ઘેરી વાડ,

સાવ રે કાચા ઘરની ભીંતે મૂક્યા છે કંઈ ખોલાંપોલા દસદસ રે કમાડ.

- મુકેશ દવે
અમરેલી
તા. ૧૬/૦૪/૨૦૨૧, શુક્રવાર