જિંદગી - ગઝલ

જિંદગી જલ્દી થતી સાચ્ચે જ પૂરી હોય છે,
ને છતાંયે કામના કાયમ અધૂરી હોય છે.

તો જ સુખની બહુ થશે કિંમત અહીયાં એટલે,
એટલાં તો કષ્ટ આ જીવને જરૂરી હોય છે.

જિંદગી રસસ્વાદથી ભરપૂર છે - માણી જુઓ,
મીઠડી આરંભથી, છેલ્લે જ તૂરી હોય છે.

ભ્રમરોને શી ગતાગમ હોય ? શું છે ખીલવું ?
ફૂલ થાવાને કળી કેટલુંય ઝૂરી હોય છે !

રોશની મોટા મહેલોની બહુ ગમતી ભલે,
કિન્તુ એની ભીતરે કાળી મજૂરી હોય છે.
(ગાલગાગા ગાલગાગા ગાલગાગા ગાલગા)(રમલ ૨૬)
- મુકેશ દવે