માણસ ક્યાં ખોવાયો છે - ગઝલ

ભૈ માણસ માણસ વચ્ચે ક્યાં ખોવાયો છે !
એ તો પોતે પોતાનામાં અટવાયો છે.

મારું-તારું-સઘળું કૈં ના હો સહિયારું,
ખૂદના દોરેલા કૂંડાળે રોપાયો છે.

નિસ્બત ન્હોતી એને શર્મગર્દીની સાથે,
જાતે ખૂલ્લી હાટે ખૂલ્લો વેચાયો છે.

ઝાકળબૂંદે આખેઆખું સરવર પીવા,
કોઈ પૂછે - "ઘાંઘો છે કે રઘવાયો છે ?"

ખાવા-પીવા-હરવા-ફરવા માટે રળવું ?
'મુકેશ' તેથી માણસ થૈને પસ્તાયો છે.

- મુકેશ દવે
(ગાગાગાગા ગાગાગાગા ગાગાગાગા)