વિદાય લેતી કન્યાનું ગીત

આંખોમાં મૈયર આંજી નીકળી રે લોલ,
પાછળ વળગ્યો આંગણાનો સાદ જો,
ખડકીમાં પાલવ અટવાઈ ગયો રે લોલ.

 હેતભર્યું પારણિયું ઝૂલતું રે લોલ,
હાલરડાં કાંઈ ઓળઘોળ થાય જો,
ખડકીમાં પાલવ અટવાઈ ગયો રે લોલ.

પગલી થઈને ઝાંઝર છમકતાં રે લોલ,
પિતાની આંગળીઓ છલકાય જો,
ખડકીમાં પાલવ અટવાઈ ગયો રે લોલ.

પાંચીકા ફળિયું ઉછાળતાં રે લોલ,
છબ્બોછબ્બો સખીએ ઘેરાય જો,
ખડકીમાં પાલવ અટવાઈ ગયો રે લોલ.

રાખડીબંધ હાથને તેડિયો રે લોલ,
કાંખે બેઠો જવતલિયો મલકાય જો,
ખડકીમાં પાલવ અટવાઈ ગયો રે લોલ.

અક્ષર પાટીના બધાં ઉકલ્યા રે લોલ,
મલક આખો ઝળહળ થાય જો,
ખડકીમાં પાલવ અટવાઈ ગયો રે લોલ.

થનગતી પાંખ ફૂટી સામટી રે લોલ,
પિયૂડાના દેશમાં મંડરાય જો,
ખડકીમાં પાલવ અટવાઈ ગયો રે લોલ.

કંકુ છાંટેલ કાગળ મોકલ્યો રે લોલ,
ઢબૂક્યો કાંઈ હૈયા માહેં ઢોલ જો,
ખડકીમાં પાલવ અટવાઈ ગયો રે લોલ.

રઢિયાળો સાફો આવી મલપતો રે લોલ,
મંગલિયાંમાં  ડૂસકાં સમાય જો,
ખડકીમાં પાલવ અટવાઈ ગયો રે લોલ.
- મુકેશ દવે (અમરેલી)
તા.૦૧/૦૯/૨૦૧૭ શુક્રવાર