નવોઢાનું હૈયું - ગીત

સાજ સજેલા ખોરડા વચ્ચે ધબક્યું ગભરું હૈયું,
ફૂલપથારી પર બેસીને હલક્યું ગભરું હૈયું.

બંધ બારણે નજરને ટાંગી
            સાંકળ થઈને ખમકે,
ધીમાધીમા પગરવ ભાળી
              પાંપણ હેઠળ ચમકે,
ભોગળરવમાં ઘૂંઘટ આડે મલક્યું ગભરું હૈયું.
સાજ સજેલા ખોરડા વચ્ચે ધબક્યું ગભરું હૈયું.

શરમશેરડા ગાલે ટહુકી
         પાનીલગ જઈ ઊતર્યા,
મણમણ તાળાં જીભે લાગ્યા
               વેણ એકે ન ઊચર્યા,
ભીનાઊના ધસમસ શ્વાસે થડક્યું ગભરું હૈયું.
સાજ સજેલા ખોરડા વચ્ચે ધબક્યું ગભરું હૈયું.
- મુકેશ દવે
અમરેલી
તા.૦૬/૦૯/૨૦૧૭
બુધવાર