સમયની કમાલ (ગઝલ)

સમય તું પણ ભલા કેવી કમાલ કરે છે !
સજાવ્યા બાદ તું અમને હલાલ કરે છે.

નથી જોતા અમારે તો કશા વિખવાદો,
તું આવીને અહીં સઘળી બબાલ કરે છે.

અમારે તો સદા તૈયાર રહેવું પડે છે,
ન ઉત્તર હોય છે એવા સવાલ કરે છે.

મને તો થાય તુજમાં મા તણાં દરશન પણ,
પહેલાં માર મારીને વહાલ કરે છે.

બધે હો ઘોર અંધારું; વળી ન કૈં સૂઝે,
તિમિર આ દૂર કરવાને મશાલ કરે છે.
- મુકેશ દવે (અમરેલી)
તા.૦૪/૦૯/૨૦૧૭
સોમવાર

(લગાગા ગાલગાગા ગાલગાલ લગાગા)