તું લમણા ઉપર હાથ મૂકીને બળબળતા નિ:સાસા નાખ'છ ? ખોંખારો ખા.
નડિંગ-ધડિંગની જેમ જીવીને પગ ઉપર ચ્યમ પગને રાખ'છ?ખોંખારો ખા.
અગમનિગમના આટેપાટે એમ ચડ્યો
કે ભ્રમણાની આંટીમાં ઊંધેકાંધ પડ્યો,
તું નવગ્રહને વીંટીમાં વીંટી બહુ નડ્યો
પછી ખોબા જેવો દરિયો પામીનેય રડ્યો,
હસ્તરેખની થાળી પકડી ટાઢાવાસી ભાગ્યરોટલા શું ચાખ'છ ? ખોંખારો ખા.
રંગબેરંગી ફૂલ ભરેલી છાબડિયું તું લેતો આવ્યો
તોય કશી ના મનમોહક કે મદભરેલી ફોરમ લાવ્યો,
પૂનમની રઢિયાળી રાતે મનભરીને તનેય ચાહ્યો
પણ શીતળતાનાં સરવરકાંઠે બેસીને તું કેમ ન નાહ્યો ?
સામે ખુલ્લું આભ હોય ત્યાં ફરફર ફૂટેલી પાંખોને શું કામ વાખ'છ ? ખોંખારો ખા.
- મુકેશ દવે (અમરેલી)
તા.૦૮/૦૯/૨૦૧૭
શુક્રવાર
ડો.અનિલવાળા સાહેબનો વિશેષ આભાર
ટિપ્પણીઓ નથી:
ટિપ્પણી પોસ્ટ કરો