નેતાજી આવ્યા( શ્રી ર.પા.ના છંદે અછાંદસ)

લોકલાડિલા નેતાજી આવ્યા છ,
શેરી,ગલી,બજાર,રસ્તા ચોખ્ખાચણાક થઈ બેસી ગ્યા છ,
ઊબડખાબડા રસ્તાઓએ ડામરના આછાં વસ્ત્રો ધારણ કર્યા છ,
(હડદોલા વગર વાહન હાંકવાની સાલ્લી મજા નથી આવતી)
સડકની બન્ને બાજુએ ઘાસઝૂંડ દંડવત કરી ગ્યા છ,
ગાયો નેતાજીના કટઆઉટ થઈ વિજપોલ પર ગોઠવાઈ ગૈ છ,
તંત્ર શીર્ષાસન કરી બેઠું છ,
રોશનિયું બોશનિયું હિલ્લોળા લે છ,
નગર નવોઢા બની ગ્યું છ,
રૂટ પરના લારીગલ્લાં ભૂખ્યા ઘરમાં આરામ કરે છ,
કાર્યકરું હરખપદુડા થઈ હડિયાપાટી કરે છ,
ઉદઘાટનું અને સભાયું ધનધન થઈ ગ્યા છ,
ને
ભાંગતી રાત્યે હરખઘેલીપ્રજાને નેતાજી ટાટા કરી ગયા છ.

અને સવારથી
આઠ દિ'નો સામટો કચરો નગરચર્યા કરવા નીકળી પડ્યો,
ગાયો રસ્તા પર અડિંગો જમાવી બેઠી,
ખાડાખબડા જાયુંભાયું સાથે રસ્તાને હિલ્લોળવા લાગ્યા,
બેનર ધજાયું થઈ ફરફરવા લાગ્યા.........
હાંશ !!!!!
હવે કંઈક જીવવાની મોજ આવી.
- મુકેશ દવે
અમરેલી 
તા.૧૪/૦૯/૨૦૧૭, ગુરુવાર