ગીત- નજરુંને શરમ આવી નૈં

લાલલીલી ઓઢણી ફરકંતી દીઠી ન દીઠી ને
દોડતીક પહોંચી ગઈ તૈં,
મૂઈ નજરુંને લગીરે શરમ આવી નૈં....!!

પાનના આ ગલ્લા પર ઢાળેલા બાંકડે
ગુટખા ને ફાકી ગોઠવાયા,
ટીવીમાં ગુંજતા નાચતા એ ગીતમાં
હવાતીયાં મારે ભૂરાયા,
છલકંતુ બેડુ એક અમથું જ્યાં હલક્યું ને
આખોયે બાકડો તાતાથૈ.
મૂઈ નજરુંને લગીરે શરમ આવી નૈં....!!

ચોક વચ્ચે ખાંસતી મોતીયાળી આંખોને
ઝાંઝરીનું છમછમ સંભળાયું,
નેજવાની નીચેથી ઝલામલા થાતું એક
ચીપડાળ કૌતુક પટકાયું,
પગલીએ પગલીએ પગેરું દબાવતી
ડગમગતી લાકડી ગૈ...
મૂઈ નજરુંને લગીરે શરમ આવી નૈં....!!
- મુકેશ દવે
- મુકેશ દવે
૧૩/૧૦/૧૪